Undersøkjer leilegheit

I 15-tida laurdag ettermiddag landa politihelikopteret med representantar for bombegruppa til Oslo politidistrikt i Gloppen.

Leilegheita der ei kvinne kan ha blitt utsett for det potensielt svært giftige stoffet ricin, blir no undersøkt.

– Dei har gått inn i leilegheita og starta arbeidet sitt, opplyser innsatsleiar Joachim Malterud i Vest politidistrikt klokka 16.30.

I 18-tida arbeider spesialistane framleis på staden.

Kjemikaliedykkarar frå Gloppen brann og redning er på staden, klare til å bistå politiet ved behov.

Kvinna er innlagt ved Førde sentralsjukehus. Klokka 14.50 opplyste politiet til NRK at tilstanden hennar er stabil.

Det er oppretta sak, men vedkomande, som skal vere ukjend for politiet frå før, er ikkje avhøyrd enno.