34 Høgre-lag tek til orde for framleis avgiftskutt på drivstoff
34 Høgre-lag har sendt protestbrev til partileiaren om å forlengja avgiftskutta også etter 1. september.
Nationen har gjort ei oppteljing som viser at 34 kommunelag i Høgre har signert brev til partileiinga om å forlengja avgiftskutta også etter 1. september.
– Situasjonen og oljeprisen er no for uføreseieleg for bygg- og anleggsbransjen og entreprenørnæringa, seier Høgre-ordførar Vegard Bjørnevik i Kvinnherad i Vestland til Nationen.
Annonse
Høgre-ordføraren i Kvinnherad understrekar at det ikkje er bensin, men diesel som driv norsk næringsliv, og at Stortinget derfor bør setja inn støyten mot avgiftene på diesel.
– Entreprenørbransjen er den bransjen som utviklar landet vårt, og transportbransjen er den som driftar det.
I Kvinnherad Høgre tok dei måndag kveld ei samrøystes avgjerd om at dei skal senda brev til partileiinga, i protest mot at avgiftskutta ikkje blir forlengde.
– Eg er ueinig med partileiinga, seier Høgre-ordføraren.
Annonse
Kvinnherad-ordføraren peikar på at hans eige parti spelte ei nøkkelrolle i å fronta avgiftskutta i Stortinget i vår, og meiner partileiinga no «bør stå løpet ut».
– Eg er glad for at Ine Marie Eriksen Søreide seier at dersom krisa kjem tilbake, så vil dei sjå på det igjen. Men eg meiner at krisa ikkje har forlate oss, understrekar Høgre-profilen. (©NPK)
