Leik og vennskap i barnehagen

Tema for barnehagedagen i 2022 var «Vennskap – du og eg». Barnehagane markerte sjølve dagen 15. mars, men temaet jobbar vi med heile året.

Rammeplan for barnehagen framhevar kompetanse om sosialt samspel som viktig for å skape gode relasjonar mellom barn.

Alle likar å leike

Vi som arbeider i barnehagen observerer og følgjer med på kor tid barna treng støtte og hjelp til å kome inn i leiken. Alle barn er ulike og har ulike utgangspunkt for å utvikle god leikekompetanse.

Enkelte barn er flinke til å invitere og lage leikegrupper, andre har dei gode ideane til innhald og driv i leiken, nokre strevar med å finne sin plass eller få lov til å vere med, men felles for alle barn er at dei likar å leike. Det er viktig for barn å oppleve fellesskap med andre barn for å føle seg trygge, utvikle seg og ha det bra.

I hjernen lagres minner som små «spillefilmer». I de dramaturgiske barnehagene, hvor det er spennende prosjekter og samlingsstunder, så gir det næring til disse spillefilmene slik at barna har noe å bringe inn i barnefellesskapet. De kan liksom trykke på play og så har de et innhold å leke.

Ulike former for vennskap

Som foreldre og vaksne ønskjer vi at barna skal finne gode venner, og kanskje har vi lett for å tru at om berre to (eller fleire) barn er saman vil dei verte gode venner. Det kan sjølvsagt skje, men så enkelt er det nok ikkje.

Å få seg ein venn krev stor sosial dugleik. Barnet må vite korleis ein tek kontakt og få innpass og invitasjon til å vere med. Det tek litt tid å etablere ein relasjon med gjensidig tillit og omsorg for kvarandre. Venner likar og stolar på kvarandre. Å vere saman med andre som likar det same som deg er gjevande. Dette kan vi kjenne igjen som vaksne og. Å dele same glede og interesse for noko skapar fellesskap og samhald. Vi tilfører meir kunnskap til felles tema ved å vere saman.

Barnehage og fritid

Barna tilbringer ein stor del av barndomen i barnehagen. Her møter barna andre likesinna, jamaldrande eller barn med same interesse, og barna utviklar ofte gode vennskap.

På fritida møter barnet andre barn i ulike samanhengar: hos naboen, på trening, på ferie, i familien osv., og skapar nye vennskap. Vi har ulike former for venner. Å vere venner treng ikkje bety at ein er venner. Å inkludere, bry seg, vise omsorg og vere snill mot andre handlar meir om å utvikle sosiale ferdigheiter og prososial åtferd, som igjen dannar eit godt grunnlag og utgangspunkt for å skape og etablere gode vennskap.

Bryr seg om kvarandre

Kva betyr det å vere venner? Må vi vere venner med alle? Og kvifor er venner så viktig?

Ein venn er noko meir enn ein leikekamerat. Ein venn vel du å leike med, og blir vald til å leike med.

Å vere venner betyr også at ein bryr seg om korleis den andre har det. Dersom ein venn ikkje kjem i barnehagen, vert det raskt observert og lagt merke til. Barna saknar kvarandre når dei ikkje er saman, og dersom vennen er sjuk, viser barna empati for den som må vere heime. Barn treng hjelp til å forstå kvarandre.

Lærer gjennom leik

Vi ser at barna lærer seg sjølv og andre å kjenne gjennom leik. Margaretha Öhman har sett på kjenneteikn på vennskap mellom barn og ser at eit vennskap vert bygd på tillit og tåler litt utprøving.

Alle har vel opplevd at barn kranglar om leikar, eller om å vere først, størst eller best. Når barn kranglar, kjempar dei for å skape orden og for å finne sin plass i relasjonen eller fellesskapet. Dersom maktbalansen vert skeiv, der det eine barnet alltid skal styre leiken og den andre må føye seg, vil ikkje leiken vere likeverdig. Då er det godt å ha foreldre og tilsette i barnehagen som kan hjelpe og støtte barna når dei treng det.

Klarer å ordne opp

Kanskje er vi for raske med «å ordne opp» når barn utfordrar kvarandre?

Gjennom leik lærer barn å kommunisere, forhandle, finne kompromiss og bli einige. Vi skal ikkje akseptere at barn er stygge med kvarandre, og vi skal hjelpe når dei treng det, men dei treng også å lære korleis dei må oppføre seg for å bli einige og inngå kompromiss. Barn klarer stort sett å ordne opp sjølve, og vi høyrer gjerne «skal vi vere venner?»

Leik er ein viktig del av vår moralske utvikling.

Fokus på fellesskapet

Ved å ha fokus på fellesskapet framfor vennskap legg vi til rette for at barna vert godt kjende med kvarandre på tvers av alder, kjønn og modning.

I barnehagen legg vi til rette for at barna vert godt kjende gjennom felles opplevingar og aktivitetar. Dagane i barnehagen kan opplevast (i større grad enn tidlegare) å vere prega av vaksenstyring og tidsstyring, medan vi helst vil prioritere tid og ro til å skape gode grupper av fellesskap der barna kan fordjupe seg i leiken saman med tilsette som kan tilrettelegge, vere nær og hjelpe barna i samhandling med kvarandre. Den vaksne si rolle vert å legge til rette, beskytte og støtte barnet i leiken.