Heilt Konge, med stor K

Noreg er i sorg etter at Hans Majestet Kong Harald sovna stille inn på Rikshospitalet fredag 28. august 2026 kl. 06:35. 

Kong Harald var kongen som synte ei framifrå rolleforståing, som var heile folket sin konge som aldri heva seg over dei han var konge for, men som var éin av dei, og som alltid såg dei kring seg. 

Han var kongen som var til stades når kriser oppstod og det verkeleg røynte på. Som då han køyrde rundt i caps, støvlar og boblejakke etter nyårsorkanen sine herjingar på Nordvestlandet i 1992, og som då han sterkt bevega snakka til folket sitt både som konge, far og bestefar då terroren råka i 2011.

Kong Harald var kongen som var genuint oppteken av heile det langstrekte landet vårt. Saman med dronning Sonja reiste han land og strand rundt for å møte folk der dei budde og for å bli betre kjend med lokalsamfunna dei levde i. Han gjorde avstanden mellom kongehuset og folk flest mindre, og han var høgt elska og respektert av det folket han representerte. 

Majesteten la aldri skjul på at han frykta oppgåva som venta då kong Olav gjekk bort i 1991. Det er vel knapt nokon annan konge som så ope har erkjent denne frykta, men det at han torde å vere ærleg, open og sårbar, viste litt av det som budde i han og gav han på mange måtar ein ekstra dimensjon. Han var humørfylt, raus og inkluderande, og bidrog til at alle nordmenn, også dei som har kome hit frå andre nasjonar, har kjent og kjenner seg heime i Noreg. 

Han hadde store sko å fylle etter far sin, kong Olav V, og bestefar sin, kong Haakon VII. Forgjengarane levde så absolutt opp til valspråket «Alt for Norge», ikkje minst gjennom haldninga dei viste og innsatsen dei la ned for landet under den andre verdskrigen. 

Kong Harald har til fulle fylt desse skoa. Sjølv om det nok har røynt på mang ein gong, ikkje minst med omsyn til uroa kring dottera Märtha Louise, svigerdottera Mette-Marit  og bonusbarnebarnet Marius dei siste åra, har han styrka og utvikla det norske monarkiet.

Han var den heile veden som meinte kongehuset si rolle var å vere limet i samfunnet og halde nasjonen samla. Sterkare lim kunne Noreg ikkje ha fått, rolla som samlande monark er knapt mogleg å fylle på ein betre måte enn det kong Harald gjorde. 

No heiter Noreg sin konge Haakon VIII. Om faren hadde store sko å fylle, er dei ikkje mindre for den nye monarken vår. Vi er trygge på at han har det som skal til for å gå inn i rolla, leve opp til forventningane og styrke det norske monarkiet ytterlegare. 

Starten, ikkje minst den første talen til folket som konge laurdag, lovar svært bra. På ein framifrå måte balanserte han det varme, personlege og nære med det alvorlege, formelle og nasjonen sine interesser og krav. 

Vi takkar kong Harald V for alt han var for landet vårt, og ønskjer kong Haakon VIII all mogleg lukke til med den store oppgåva som ventar han. 

Kong Harald er død, leve kong Haakon!