Kjem til Sandane for første gong på sju år

Cirkus Arnardo nærmar seg Nordfjord og Gloppen med stormskritt, og vitjar Sandane for første gong sidan 2019 med framsyning på Utstillingsplassen onsdag 13. mai. 

- Årets nye framsyning – den 77. i rekkja sidan starten i 1949 – byr på spektakulære artistar, som til dømes den grasiøse luftakrobaten Chiara Boldini som opptrer med ei flygande lysekrone utsmykka med 3000 glitrande krystallprismer. Chiara demonstrerer ein imponerande styrke og mjukheit inni, rundt og oppå den to meter høge lysekrona som svingar og dansar gjennom lufta høgt oppunder teltkuppelen, skriv Cirkus Arnardo i ei pressemelding. 

Cirkus Arnardo si historie byrja med bestefar Arne Arnardo. Deretter kom far Arild, som ble ein nestor for sirkusfolk verda over. No er det sirkusdirektør Are Arnardo, som saman med familien sin vidarefører arven etter far og bestefar.

Både Arnardo-tradisjonen og nyskapande sirkusvisjonar er viktige for Are Arnardo når han i år presenterer ei ny framsyning for det eldste sirkuset i landet. Igjen skal minne skapast.

Are Arnardo er blitt ein erfaren og akta sirkusdirektør som visepresident i prestisjetunge ESU – European Showmen’s Union, og styreleiar i Norsk Cirkus og Tivolieierforening.

- Sirkus gjev minne etter ugløymelege opplevingar. Ei stund der ein kan legge bak seg kvardagen for å overgje seg til latter, spenning og forundring, heiter det i pressemeldinga. 

- Vi gler oss til endå ein gong å la bestefar sine ord bli våre: Den største gleda ein kan ha, er å gjere andre glad, seier Are Arnardo.