80 prosent av innlagde koronapasientar overlevde

I alt 80 prosent av alle koronapasientar som har vore lagde inn på intensivbehandling i norske sjukehus, har overlevd.

Tal P4-nyheitene har innhenta frå Folkehelseinstituttets vekerapport viser at per 8. november har 273 pasientar vore innlagde på intensivavdelingar med koronasmitte. 210 av desse er skrivne ut.

– Vi har jo klart å halde smittetalet såpass lågt, og dermed har dei med alvorleg sjukdom vore såpass få at helsesystemet har klart å behandle desse på ein god måte og har hatt kapasitet til dette heile vegen, seier avdelingsdirektør Line Vold i Folkehelseinstituttet.

16 prosent av dei innlagde med koronasmitte vart innlagde på intensivavdelingar. Snittalderen var 62 år. 69 prosent hadde minst éin risikofaktor, utan at høg alder var teken med.

– Vi må ta denne situasjonen på alvor. Når vi ser utviklinga no, så har ho vore ganske dramatisk når det gjeld stigning i smittetala, og også i Noreg kan vi få ein situasjon der helsesystemet vårt kjem i strekk, åtvarar Vold.

(©NPK)