Vil sjå fjorden – flyttar frå sentrum og opp i høgda

– Eg er heilt avhengig av utsikt, og gler meg til å flytte inn i nytt hus til sommaren, seier Gunnar Stensaker.

– Eg kjem opphavleg frå Måløy. Vi budde der oppe i Gate 6 med fantastisk utsikt mot sjøen. Eg må berre sjå fjord og sjø, og gler meg til å flytte inn her med denne utsikta, smiler Gunnar Stensaker.

Saman med kona, Lisbeth Stensaker, kjøpte dei tomt på Høgenausen rett over Sandane sentrum. Huset er under oppføring, og planen er å flytte inn til sommaren. Huset ligg fint til saman med fleire nybygg rett nedanfor E39. Gjennom vindauga kan ein nyte ei flott utsikt over Sandane sentrum, Gloppefjorden og fjella på sørsida av fjorden.

– Det er ei fantastisk årstid no. Blå himmel og kvitt på toppane. Det er ei nydeleg utsikt, seier Stensaker.

Dei bur no i ei leilegheit i Sandane sentrum, men lengta tilbake til igjen å bu i ein einebustad.

– Leilegheit i sentrum er fint, det, men vi sakna det å ha litt betre plass. No byggjer vi alt på ei flate for oss to oppe, og har gjesterom i kjellaren, seier han.

Det er fleire handverkarar i sving rundt om på huset medan vi er der, og Gunnar sjølv jobbar med uteområdet.

– No er planen å kunne få flytte inn til pinse, og vi gler oss, seier han.