Vestland leiar program for berekraft i sjømatnæringane
Vestland fylkeskommune skal leie utviklinga av eit tiårig program som skal sikre ei berekraftig utvikling av sjømatnæringane i Vestland.
Det vedtok fylkesutvalet torsdag.
Vestland fylkeskommune ønskjer å utvikle og styre eit større tal på prosjekt saman med sjømatprodusentane, kommunane og statlege forvaltingsorgan, skriv dei i ei pressemelding.
Artikkelen held fram under annonsen.
– Den store omstillinga frå produksjon og sal av fossilt brensel krev satsing på andre og berekraftige område. Å satse strategisk på dei marine næringane er derfor svært viktig. Programmet vi no lanserer går over ti år og skal gi næringane vilkår til å vekse og styrke posisjonen sin, seier fylkesordførar Jon Askeland i pressemeldinga.
Målet er at programmet skal bidra til å auke verdiskapinga og tal på arbeidsplassar i sjømatnæringane i Vestland. I tillegg skal det vere med å skape aktive kystsamfunn med attraktive arbeidsplassar.
(©NPK)