Urnes og Borgund kan råkast av kutt i museumsstøtta

Fortidsminneforeininga reagerer kraftig på forslaget om å fjerna museumstilskotet. Foreininga meiner støtta er nødvendig for å ta vare på kulturminne og formidla historia deira.

– Me bad om ei nødvendig opptrapping. Svaret frå regjeringa er å fjerna heile det eksisterande øyremerkte museumstilskotet på 5,6 millionar kroner, seier styreleiar Trude Knutzen Knagenhjelm.

Støtta har vore gitt sidan 2016 og går mellom anna til fagfolk som hjelper frivillige, dokumenterer kulturminne og sørgjer for at dei blir tekne vare på.

I Vestland kan kuttet råka Urnes stavkyrkje, Borgund stavkyrkje, Hopperstad stavkyrkje og Stranges Stiftelse i Bergen. Også kulturminne i Trøndelag, Buskerud og Troms blir råka.

Knagenhjelm åtvarar om at dei frivillige ikkje kan ta heile ansvaret for å bevara kulturarven utan fagleg støtte.

– Me treng fagfolk som kan vareta kulturminna og formidla kunnskapen om dei. Dei frivillige kan ikkje bera dette ansvaret åleine, seier ho.

Foreininga krev at dei 5,6 millionane blir førte tilbake i statsbudsjettet. I tillegg ønskjer ho ein auke på seks millionar kroner i 2027 og ei meir føreseieleg finansiering framover.

I 2025 hadde Fortidsminneforeininga sine museumseigedommar 230.000 besøkjande. (©NPK)