Svært gode resultat i behandling av panikkliding
I ein studie av 4-dagarsbehandling av panikkliding oppnådde Helse Førde svært gode resultat samanlikna med andre tilsvarande studiar i Noreg og internasjonalt.
Studien undersøkte effekten av 4-dagarsbehandling av panikkliding ytt av OCD/4-dagarsteamet i Førde mellom 2018 og 2020. Studien syner svært gode behandlingsresultat, også samanlikna med studiar frå dei fremste miljøa internasjonalt.
– Vi såg at om lag fire av fem var i remisjon (friske) etter behandlinga, og at dette heldt seg frå behandlinga var slutt og fram til oppfølgingstidspunktet etter tre månader. Dette viser at miljøet vi har bygd opp i Førde tilbyr ei behandling av panikkpasientar som er av svært høg kvalitet, og ein kan trygt seie at klinikken leverer resultat i verdsklasse, seier Thorbjørn Olsen og Ida Ueland Sætre.
Artikkelen held fram under annonsen.
Dette er også bakgrunnen for at Ueland Sætre og Olsen i fjor vart bedne om å lære opp eit av dei fremste angstmiljøa i Europa, då dei ønskte å implementere denne behandlinga ved universitetsklinikken i Hamburg.
– Det er svært kjekt at det gode arbeidet som blir gjort i Førde blir dokumentert i internasjonale tidsskrift, og at vi med dette set Førde på kartet i høve angstbehandling.
Artikkelen og forskningsprosjektet er eit samarbeid mellom OCD/4-dagarsteamet i Førde og Bergen Center for Brain plasticity ved Haukeland Universitetssykehus i Bergen, Universitetet i Bergen og Helse Møre og Romsdal.
Tre av behandlarane ved Førde DPS; Ida Ueland Sætre, Thorbjørn Olsen og Rolf Olof Sköld er også medforfattarar på artikkelen.