Står saman for samferdsla
Eit samla Vestlandsråd inviterer fredag stortingspolitikarane til møte om Nasjonal transportplan (NTP).
Målet er å sette fokus på dei viktigaste samferdslesakene i landsdelen. Tema på møtet vert ferjefri E39, skredsikring, ferjedrift og vegvedlikehald skriv fylkeskommunen på sine nettsider.
På møtet i Oslo møter representantar for Vestlandsrådet stortingsrepresentantar frå Rogaland, Hordaland, Sogn og Fjordane og Møre og Romsdal, representantar frå transport- og kommunikasjonskomiteen og frå regjeringa.
Uroa for fleire prosjekt
– Vestlandsrådet ønskjer å vise at infrastruktur og samferdsle på Vestlandet, og mellom Vestlandet og resten av landet, handlar om å fremje vekstpotensialet for heile nasjonen, seier leiar i Vestlandsrådet og fylkesordførar i Sogn og Fjordane, Jenny Følling.
– Eg er uroa over framdrifta for fleire av prosjekta i NTP, som prosjekt langs E39. Trygging mot ras og skred og opprusting av tunnelar må også sikrast betre, seier Følling.
Ho vil opne møtet med orientering om dei største felles problemstillingane.
Næringslivet på bana
Fylkesordførarane i dei fire fylka vil også orientere om sentrale fylkesvise utfordringar.
Avdelingsdirektør Per Øyvind Langeland i NHO Norge vil tale næringslivet si sak, og legge fram deira transport- og samferdslebehov og prioriteringar på Vestlandet.
Han legg vekt på kommunikasjonsutfordringane mellom Vestlandet, landet elles og Europa.
Fire store problemstillingar
Dei viktigaste samferdslesakene for Vestlandsrådet er:
• Ferjefri og opprusta E39 mellom Kristiansand og Trondheim: Statleg plan for utbygging av ferjefri og opprusta E39 i løpet av 20 år må oppretthaldast og fullfinansierast.
• Forfallet på fylkesvegnettet: Det trengst eit krafttak for å ta att etterslepet på både riks- og fylkesvegnettet.
• Rassikring: Vegnettet må vere sikra mot ras og skred innan 2030, i tråd med tilrådingane frå Nasjonal rassikrigsgruppe.
• Ferjedrift: Det er behov for vesentleg betre rammevilkår for kjøp av ferjetenester.
Vestlandet er ein nasjonaløkonomisk motor – med størst fastlandseksport i landet. Eit godt ferjetilbod er m.a. avgjerande for konkurranseevna til eksportindustrien. Vestlandsrådet ber også staten legge til rette for å kunne fase inn miljøferjer.
