Stad skipstunnel for dyr – blir vraka i statsbudsjettet

– I forslaget til statsbudsjett vil vi gjere det kjent at vi avsluttar arbeidet med Stad skipstunnel. Det blir så dyrt at vi meiner det ikkje er ansvarleg å gå vidare med prosjektet, seier Støre til kanalen.

Skipstunnelen var meint å skulle gjere det tryggare å segle gjennom vêrharde Stad. Prosjektet har vore utgreidd meir enn 20 gonger sidan 1990 og har vore ut og inn av statsbudsjetta i fleire tiår.

I 2021 stemde alle parti på Stortinget utanom MDG ja til prosjektet.

Både Kystverket og kommunane i området har brukt fleire hundre millionar kroner på eigedomskjøp, planlegging og tilretteleggingar.

Den opphavlege kostnadsramma var på 5 milliardar 2025-kroner. I 2023 vart prosjektet sett på vent etter ein ny prognose frå Kystverket på 7,1 milliardar. I det siste kostnadsoverslaget utgjer prosjektet seg til 9,4 milliardar kroner.

– Vi må prioritere og snu på kvar krone for å bruke pengane så effektivt som mogleg. Derfor seier vi nei til dette prosjektet, som vi meiner ikkje forsvarer så stor pengebruk, seier Støre.

Han seier vidare at det ikkje går an å få gjennomført prosjektet rimelegare. Og at det på grunn av mykje merksemd rundt skipstunnelen, er rett at informasjonen kjem fram før forslaget til statsbudsjettet blir lagt fram.