SSB: Prisveksten har ikkje vore høgare sidan 1988
Konsumprisindeksen (KPI) har stige med 5,7 prosent frå mai i fjor til mai i år. Det er den høgaste tolvmånadersveksten SSB har målt sidan desember 1988.
– I eit historisk perspektiv er dette den sterkaste prisveksten målt sidan desember 1988. Det er først og fremst auka prisar på straum og drivstoff som gjer at tolvmånadersendringa i KPI er så høg, seier seksjonssjef Espen Kristiansen i SSB.
Høg prisvekst på møblar og matvarer bidreg også til auken.
Artikkelen held fram under annonsen.
– Den høgare tolvmånadersraten kjem sjølv om straumprisane gjekk noko ned frå april til mai, medan dei gjekk opp på same tid i fjor. Isolert sett trekkjer straumprisen auken i KPI ned, men prisane stig på mange nok andre varer og tenester til at veksttakten likevel aukar frå april til mai, seier Espen Kristiansen.
Matvareprisane var 3,1 prosent høgare i mai enn eitt år tidlegare, opp frå ein tolvmånadersvekst på 2,1 prosent i april.