Søknadsrekord til Kulturminnefondet
Kulturminnefondet har fram til no i år mottatt like mange søknader som i heile fjor. Direktør Simen Bjørgen ventar at søknadsveksten vil halde fram ut året.
Interessa for å setje i stand kulturminne og kulturmiljø slår alle tidlegare rekordar. Fram til no i år har Kulturminnefondet fått inn 1.237 søknader om til saman 355 millionar kroner til ulike bevaringstiltak. Til samanlikning vart det i heile fjor søkt om 331 millionar kroner, melder Kulturminnefondet.
Kulturminnefondet har fram til no i år delt ut 65 millionar kroner til istandsetjing av bygningar, båtar og fartøy, bilar og køyretøy, og til strakstiltak, kurs og formidling.
Artikkelen held fram under annonsen.
– Vi får inn mange veldig gode søknader, og vi synest det er svært flott at eigarar ønskjer å verne kulturmiljø og historia deira, seier Bjørgen, direktør i Kulturminnefondet.
Tilskotsordninga er underlagd Klima- og miljødepartementet, og målgruppa er private eigarar og frivillige organisasjonar.
Søknadene blir behandla fortløpande, men den store søknadsveksten resulterer i noko lengre saksbehandlingstid. Kulturminnefondet er no spesielt oppteke av at prosjekt skal starte raskt, for å bidra til økonomisk utvikling i samfunnet under og etter koronapandemien.
(©NPK)
