Helseminister Bent Høie (H) vil fredag orientere om koronavaksinering i Noreg. Foto: Vidar Ruud/NTB/NPK.

Regjeringa varslar nyheiter om koronavaksinasjon

Helseminister Bent Høie har kalla inn til pressekonferanse fredag der temaet er koronavaksinasjon.

Pressekonferansen blir halden klokka 11.30 fredag. I tillegg til Høie skal helsedirektør Bjørn Guldvog, smitteverndirektør Geir Bukholm i FHI og direktør Audun Hågå i Statens legemiddelverk delta.

Onsdag denne veka vart det kjent at koronavaksinen til selskapa Pfizer og Biontech er godkjent i Storbritannia.

Tidlegare har Det europeiske legemiddelverket (EMA) opplyst at dei skal ha møte 29. desember og avgjere om det er nok data til å godkjenne koronavaksinen frå Pfizer og Biontech. Ei godkjenning frå EMA vil òg gjelde i Noreg.

Sveriges vaksinekoordinator Richard Bergström sa onsdag til NRK at Noreg vil få fleire hundre tusen vaksinedosar rett over nyttår.

– For Noregs del snakkar vi om leveranse på fleire hundre tusen dosar i januar. Og i alle fall mellom to og to og ein halv millionar dosar første kvartal, sa Bergström til kanalen.

Det er Sverige som sørgjer for Noregs tilgang til koronavaksinar gjennom avtalane mellom legemiddelprodusentane og EU-kommisjonen.

(©NPK)