Regjeringa har fordelt 2,8 milliardar kroner i spelemidlar

Regjeringa fordelte fredag over 2,8 milliardar kroner i spelemidlar til idrettsformål i 2018. Beløpet er 227,5 millionar høgare enn i fjor.

– Årets fordeling av spelemidlar til idrettsformål er den høgste nokon gong. For regjeringa er det viktig å styrkje rammevilkår for lokal idrett og fysisk aktivitet over heile landet, seier kulturminister Trine Skei Grande (V).

Den største potten går til bygging og rehabilitering av idrettsanlegg i kommunane, med over 1,4 milliard kroner. Dette er 109 millionar meir enn i fjor, og sidan 2013 er denne posten auka med 689 millionar kroner.

– Anlegg er avgjerande både for den organiserte idretten og for eigenorganisert fysisk aktivitet. Rekordsummen som vert fordelt i år har stor betydning for kommunar, idrettslag og foreiningar som tek på seg kostbare anleggsinvesteringar, seier Grande.

Vidare har regjeringa fordelt 367 millionar kroner til lokale lag og foreiningar. 40 millionar kroner fordelast til tilskotsordninga for nyskapande aktivitetsarenaer, medan 18 millionar går til inkludering i idrettslag for 2019. 36 millionar kroner går til friluftslivstiltak for barn og ungdom og 27 millionar til løypetiltak i fjellet og overnattingshytter.

(©NPK)