Katteeigarar er ikkje like flinke som hundeeigarar til å ID-merke kjæledyret sitt.Foto: Kari Hamre / NPK

Oppfordrar til å ID-merke familiedyr som skal på ferie

Det kan vere lurt å ID-merke kjæledyr som skal vere med på ferie i sommar. Kvart år kjem familiedyr på avvegar, og det kan vere vanskeleg å gjenforeine dyr og eigar dersom dyret ikkje har ein mikrochip under pelsen.

Ifølgje den nasjonale portalen for familiedyr på avvegar, Dyrebar.no, er det no registrert 9.241 familiedyr på avvegar i Noreg. Ein tredel av desse er registrerte som funne og tekne vare på av finnar, men det har ikkje vore mogleg å identifisere eigar fordi dyra manglar chip.

– Å miste eit familiedyr vert opplevd som traumatisk og veldig vondt, forklarer Anders Brochmann i Dyrebar.no i ei pressemelding.

Dyrebeskyttelsen Norges 26 lokalavdelingar hjelpte over 6.000 familiedyr i fjor. Av desse var nær 90 prosent kattar. Alle dyr som blir tekne inn blir sjekka for chip og eigar blir etterlyst, men utan treff vil desse dyra etter kvart bli omplasserte til nye heimar. ID-chip er ein enkel måte å sørgje for at dyr og eigar blir gjenforeina. 4.100 familiedyr vart i fjor omplassert via Dyrebeskyttelsen Norges lokalavdelingar.

Har du ID-merkt familiedyret, er det vel så viktig at kontaktopplysningar er oppdaterte hos DyreID ved flytting eller andre endringar. Både politi og lokalavdelingar kjem over dyr som er chipa, men viser feil kontaktopplysningar.

Ifølgje DyreID er over 70 prosent av hundane ID-merkte, men eigarar av kattar, kaninar og andre dyr er ikkje like flinke.

(©NPK)