Opnar spesiell utandørs havbruksutstilling

Den 9. juni opnar Firda Seafood Blue Garden, som er ei permanent utandørs utstilling om havbruk, på den gamle handelsstaden Skjerjehamn i Gulen i ytre Sogn. Fiskeridirektør Liv Holmefjord står for den offisielle opninga.

Firda Seafood søkte om – og fekk tildelt visningskonsesjonen i 2008, og senteret har vore i drift sidan 2010. Selskapet samarbeidde då med VilVite-senteret i Bergen om ei teknisk utstilling for barn og unge. Blue Garden er ei fornying av konseptet, tilpassa ei meir vaksen og internasjonal målgruppe, skriv nettavisa IntraFish.

– Vi vil framheve særpreget til Skjerjehamn og den historiske tilknytinga til havet, i tillegg til å rette blikket mot globale utfordringar knytt til matproduksjon. Havbruk er ei av dei viktigaste løysingane på utfordringar i framtida, seier Ola Braanaas, eigar og administrerande direktør i Firda Seafood, i ei pressemelding.

Den utandørs utstillinga blir analog. Gjennom ulike installasjonar i naturen kan ein utforske korleis laks og fjordaure blir produsert i Noreg i dag, og kvifor det vil bli viktig for verda i morgon.