Nynorskstipend på 150.000 kroner på Vestlandet
For å synleggjere nynorsk som språk og kulturberar vil Vestland fylkeskommune lokke kunstnarar og eller formidlarar som brukar nynorsk med eit stipend på 150.000 kroner.
Nynorskstipendet vert delt ut for første gong i år og skal sidan skje årleg. Stipendet vert lyst ut nasjonalt, men mottakaren må ha tilknyting til Vestland fylke gjennom verksemda si.
– Bakgrunnen for nynorskstipendet var tildelinga av Nobels litteraturpris til Jon Fosse i 2023. Som heimfylket til ein nobelprisvinnar vil vi heidre Fosse, og vi ønskjer å gjere dette i form av eit stipend, som skal løfte fram nynorsken, seier Jacob Nødseth, leiar for hovudutvalet for kultur, idrett og inkludering i fylkeskommunen.
Annonse
Stipendmottakarane kan vere både forfattarar, dramatikarar og formidlarar av nynorsk litteratur og forfattarskap i tekst og på scene.
Vestland er fylket med flest nynorskbrukarar.
– Nynorsk er under press. Som det største nynorskfylket og det leiande kulturfylket, skal Vestland ta eit nasjonalt ansvar for å styrkje nynorsk både som kvardagsspråk og kunstspråk. Nynorskstipendet er ein del av denne politikken, og eg håpar på mange gode nominasjonar, seier Nødseth. (©NPK)
