Norsk matproduksjon kan bli ramma av krigen i Midtausten

– Situasjonen er veldig alvorleg. Først og fremst for dei store humanitære og politiske konsekvensane. Matproduksjonen kan bli alvorleg ramma viss krigen trekkjer i langdrag, seier konserndirektør Hanna Opsahl-Ammar i Yara til NRK.

Ein tredel av dei viktigaste ingrediensane som blir brukte til gjødsel, blir frakta frå Persiabukta der skipa er stansa. Dermed kan produksjonen av mykje av kunstgjødsla som heile verda bruker, raskt bli trua.

Ein tredel har ikkje bestilt

Her heime er våronna snart i gang. Men Felleskjøpet, som distribuerer mineralgjødsla til norske bønder, tek ikkje lenger inn nye bestillingar.

– Situasjonen er per no uoversiktleg og kan skape raske og uventa rørsler i marknaden. For å sikre kontroll på forsyningar og prisar set vi salet på pause inntil vidare, opplyser Felleskjøpet til Nationen.

Det meste av det norske bønder bruker av mineralgjødsel, blir levert frå Felleskjøpet Agri og Felleskjøpet Rogaland Agder.

Omkring 70 prosent av dei norske bøndene har allereie bestilt gjødsel. Det er normalt å starte bestilling allereie sommaren før, og nokre har til og med allereie fått gjødsla levert. Men ein tredel hadde framleis ikkje levert bestillingane sine då krigen starta.

– Det er mindre enn ein tredel av salet som står att fram mot sommaren. Varelageret vårt er tilstrekkeleg til å dekkje dei ordrane som er registrerte før den mellombelse stoppen i sal vart innført, opplyser pressesjefen Sigbjørn Vedeld i Felleskjøpet i Agri til NTB.

Det vart stopp på levering av gjødsel tysdag kveld klokka 19.

Yara: Alvorleg

For å produsere gjødsel til matproduksjonen, treng alle fabrikkane til Yara ingrediensane urea, ammoniakk og fosfat.

– Matsystemet er sårbart, og gjødsel speler ei heilt avgjerande rolle for å skaffe befolkninga i verda nok mat, seier konserndirektøren.

Yara jobbar med bonden for å optimalisere bruken av gjødsel, så ein kan få gode avlingar sjølv om ein gjødslar mindre. Men viss bonden lèt vere å gjødsle heilt i eitt år, vil avlinga reduserast med 50 prosent.

– Samtidig ser vi no at gjødsel får ein dobbeltsmell, både fordi produksjonen i regionen delvis er nede og fordi det er vanskeleg å få ingrediensane ut. Samtidig aukar råvareprisane. (©NPK)