Norsk kraft skal styrast frå Norge

Lesarinnlegg av Gloppen Nei til EU ved leiar Jostein Hansen.



Nei til EU (NTEU) har gåande ein landsomfattande kampanje for å opplyse om EU sitt energibyrå ACER, og handsaminga av denne saka om styring av dei norske kraftressursane i Stortinget i mars. NTEU meiner at tilslutning til ACER inneber å avgje nasjonal sjølv råderett til EU. Vi krev difor at ei avrøysting i Stortinget må ta utgangspunkt i §115 i grunnlova, som krev ¾ fleirtal for å avgjera saka.

Det ser ut til at press frå grasrota, m.a. frå NTEU, har påverka Ap til å stille sterkare krav til regjeringa for at partiet skal kunne gå med på å gje stønad til EU sin tredje energimarknadspakke, der ACER er ein viktig del.

Ap sine krav er m.a. at Norges olje- og gassressursar er det norske folk sin eigedom og skal kome heile samfunnet til gode, at minst to tredeler av norske kraftressursar skal vere offentleg eigd, at det skal inn i energilova av 1990 at Statnett skal eige og drifte alle framtidige mellomlandssamband, at norsk fornybar kraftproduksjon skal bidra til auka verdiskaping og sysselsetting i Norge og til å erstatte fossil energi med fornybar energi, at norske styresmakter skal ha sjølvstendig kontroll over alle viktige avgjerder for energitryggleiken i Norge, til dømes dei som gjeld industrien m.m.

Ap sine krav til regjeringa er vel og bra, men NTEU ser ikkje behovet for å slutte seg til EU sin tredje energimarknadspakke og EU sitt kontrollorgan ACER.

Gloppen NTEU er sterkt i mot å avgje meir suverenitet til EU, og vi meiner Norge så fort råd er må kvitte seg med EØS-avtalen som er basert på fri flyt av kapital, arbeidskraft, varer og tjenester og no også energi om EU får det som dei vil.