Norsk koronastudie: Større smitte internt i familiar enn tidlegare påvist
Forsking frå Universitetet i Bergen viser høgare spreiing av koronaviruset internt i familiar enn det ein tidlegare kinesisk studie har vist.
Tidlegare har ein kinesisk studie som har kartlagt smitterisiko blant familiemedlemmer, vist at 11 prosent av familiemedlemmene som blir testa, fekk påvist covid-19 smitte.
Men ein norsk studie frå Universitetet i Bergen og Haukeland universitetssjukehus, som no er publisert i det anerkjende medisinske tidsskriftet The Lancet Infectious Diseases, viser at smitterisikoen er nesten tre gonger så høg, melder TV 2.
Artikkelen held fram under annonsen.
– Vi har funne langt høgare del smitta i ein studie vi har gjennomført her i Bergen. Den viser at i gjennomsnitt er 31 prosent av medlemmene i husstandane smitta, seier professor Rebecca Cox ved Universitetet i Bergen (UiB).
Ho fortel at dei har studert familiesmitte blant 157 personar med påvist smitte i Bergen. Cox understrekar at dei har brukt ein annan metode enn i den kinesiske studien.
– Vi har brukt blodprøver for å teste antistoff i blodet til pasientar og husstandsmedlemmer som kan påvise infeksjon over ein lengre periode. Kinesarane brukte ei halsprøve som berre kan detektere virus i ein kortare periode av 1–2 veker.
– Det ser ut som metoden vår er meir sensitiv, forklarer Cox.
(©NPK)
