Noregs Bank held renta uendra – har ikkje hastverk med å setje henne ned
Noregs Bank held styringsrenta på 4 prosent. Avgjerda er i tråd med tidlegare signal frå banken, som meiner prisveksten framleis er for høg.
– Vi har ikkje hastverk med å setje renta vidare ned. Prisveksten er framleis for høg. Held vi energiprisar utanom, har prisveksten lege nær 3 prosent sidan hausten 2024, seier sentralbanksjef Ida Wolden Bache.
Det er uvisse om utsiktene, men dersom økonomien utviklar seg om lag slik komiteen no ser føre seg, blir renta sett vidare ned i løpet av året, heiter det i ei pressemelding frå Noregs Bank.
Annonse
Renta vart i fjor sett ned to gonger, frå 4,5 til 4 prosent. Noregs Bank peikar på at den geopolitiske situasjonen bidreg til uvisse om dei økonomiske utsiktene, men meiner at renteutsiktene ikkje er vesentleg endra sidan førre renteavgjerd, og at det derfor er rett å halde renta uendra.
– USA varsla i helga auka tollsatsar på varer frå Noreg og andre europeiske land som har hatt militært personell på Grønland. I går kveld, etter at komiteen tok avgjerda om renta, vart det annonsert at desse tollsatsane likevel ikkje vil bli innførte. Vurderinga til komiteen er at effektane på norsk økonomi av dei varsla tollaukane truleg ville vore avgrensa, sa Wolden Bache då ho la fram renteavgjerda på pressekonferansen frå sentralbanken torsdag.
Kan setjast ned raskare enn venta
– Noregs Bank har fått i oppgåve å sikre låg og stabil inflasjon. Målet er ein prisvekst som over tid er nær 2 prosent. Samtidig skal vi bidra til at flest mogleg er i jobb, og til ei stabil økonomisk utvikling, sa ho.
Annonse
– Etter at prisveksten skaut fart i 2022, heva vi styringsrenta mykje og raskt. Dei siste åra har renta bidrege til å kjøle ned økonomien og til å dempe prisveksten. I fjor starta vi ei forsiktig normalisering av styringsrenta og sette ned renta frå 4,5 til 4 prosent, heldt ho fram før ho understreka at Noregs Bank ikkje har hastverk med å setje renta vidare ned.
– Jobben med å få bukt med den høge prisveksten er ikkje fullført. Og set vi renta ned for raskt, kan prisveksten bli liggjande over målet for lenge. På den andre sida ønskjer vi ikkje å bremse økonomien meir enn nødvendig, sa sentralbanksjefen.
Dersom utviklinga i arbeidsmarknaden blir svakare enn anslått eller det blir utsikter til at prisveksten kjem raskare ned til målet, kan renta setjast raskare ned enn vi såg føre oss i desember, heiter det i renteavgjerda.
Prisane steig med 3,2 prosent frå desember 2024 til desember 2025, ifølgje SSB. Det er noko høgare enn venta.
I tråd med forventningane
– Avgjerda om å halde renta uendra var heilt i tråd med forventningane. Men det var spennande å høyre at dei signala Noregs Bank sende ut sist, framleis står seg. Prognosane tilseier framleis eitt til to rentekutt i 2026, seier sjeføkonom Kyrre M. Knudsen i SpareBank 1 Sør-Noreg til NTB.
Annonse
– Det er tre ting som blir viktig å følgje nøye med på no. Det første er den geopolitiske situasjonen, og all den uvissa vi opplever. Ting som Trumps utspel om Grønland og tollsatsar gjere at bedrifter og hushald blir meir forsiktige. Blir aktiviteten lågare enn det Noregs Bank har trudd, kan det tale for tidlegare rentekutt, meiner Knudsen.
Han peikar også på at inflasjonen er litt høgare enn anslaget frå sentralbanken i desember, og at den neste inflasjonsmålinga blir veldig viktig, og nemner ein tredje ting som han beskriv som ein «skikkelig x-faktor»:
– Trass i veldig mykje uro den siste tida, har kronekursen byrja å styrkje seg. Viss euroen kjem ned mot 11,30 – 11,40, vil det faktisk opne for at Noregs Bank kan komme til å kutte allereie i mars. Den skal vi følgje godt med på!
Tøft i vintermørket
– Januar inneber ekstra rekningar for mange, og blir opplevd som økonomisk tøff. Dagens renteavgjerd gjer ikkje vintermørket lysare, seier Sebastian Mikolajczyk, noregssjef i Bluestep Bank og Bank2.
Banken tilbyr lån med garanti i bustad til personar som ikkje får lån i ordinære bankar, og har den siste tida merkt ein auke av førespurnader.
Annonse
– Det var få som venta eit rentekutt i dag. Nordmenn har framleis rekordhøg gjeld, og det er mange forgjelda personar som verkeleg strevar. Desse har allereie markert datoen for neste renteavgjerd i mars, seier han.
