Nok ein statistikk fylket toppar

Tal Statistisk sentralbyrå la fram sist torsdag viser at Sogn og Fjordane toppar listene for gjennomføring i den vidaregåande skulen, og det både på studiespesialiserande og på yrkesfag.

I dei studieførebuande utdanningsprogramma gjennomfører 91,3 prosent av elevane i Sogn og Fjordane innan fem år. Dei yrkesfaglege utdanningsprogramma har lågare grad av gjennomføring, der gjennomfører 66,8 prosent.

– Tala viser at dei vidaregåande skulane arbeider godt med ungdomane. Elevane på yrkesfag har blitt flinkare til å skaffe seg læreplassar, bedriftene stiller opp med fleire læreplassar, og skulane støttar godt opp. Ekstra oppfølging av elevar og lærlingar som står i fare for å ikkje gjennomføre som følgje av stort fråvær eller låg motivasjon, kan ha innverknad på den gode statistikken, seier fungerande fylkesdirektør for opplæring, Tor-Einar Holvik Skinlo.

Motivasjon for vidare arbeid
Blant alle elevane som starta på vidaregåande opplæring – både studiespesialiserande og yrkesfag – i 2011, gjennomførte 78,6 prosent av dei opplæringa innan fem år. Det er to prosentpoeng fleire enn i 2010-kullet.

– Å få fleire til å gjennomføre, føreset samhandling og godt innarbeidde rutinar på og mellom alle nivå i opplæringsløpet. Å drive god opplæring er ein dynamisk prosess som krev at alle som er aktørar i dette arbeidet, er i utvikling. No er det viktig at alle held fram det gode arbeidet som er i gang. Statistikken kan vere grunnlag for vidare motivasjon i arbeidet med å auke gjennomføringa, slår Skinlo fast.

Akershus toppar statistikken når vi ser studiespesialiserande og yrkesfag under eitt, fordi dei har fleire ungdomar som går studieførebuande enn yrkesfag. Det er flest elevar som fullfører på studieførebuande.

Færre sluttar
Systematisk arbeid over tid fører til gode resultat. Tal sluttarar i vidaregåande opplæring har blitt redusert slik dei tre siste åra.

 

Gjennomføring i vidaregåande opplæring
Studiespesialiserande		Yrkesfag
Sogn og Fjordane	91,3	Sogn og Fjordane	66,8
Akershus	89,4	Rogaland	64,8
Møre og Romsdal	89,1	Møre og Romsdal	64,7
Nord-Trøndelag	88,2	Vest-Agder	64,3
Vest-Agder	87,7	Telemark	64
Hordaland	86,9	Akershus	63,9
Hedmark	86,9	Buskerud	61,5
Oppland	86,8	Nord-Trøndelag	61,2
Østfold	86,7	Aust-Agder	60,2
Vestfold	86,6	Hordaland	59,4
Telemark	86,2	Noreg samla	59,4
Noreg samla	85,9	Sør-Trøndelag	59,2
Rogaland	85,4	Oslo	59
Sør-Trøndelag	84,7	Oppland	58,4
Nordland	84,5	Vestfold	57
Finnmark	84,4	Hedmark	55,5
Aust-Agder	84,2	Østfold	54,2
Oslo	84,1	Troms	53,1
Buskerud	83,4	Nordland	52,6
Troms	82,4	Finnmark	47,1