Nakstad: Fleire innleggingar tyder på at mutert virus gir meir alvorleg sjukdom

Søndag var 200 koronapasientar innlagde på norske sjukehus. Det bekymrar assisterande helsedirektør Espen Rostrup Nakstad.

Det siste døgnet er det registrert 640 smittetilfelle i Noreg. 275 av dei er registrerte i Oslo.

– Vi er oppe på tilsvarande nivå der vi var på toppen av den andre bølgja, som var omtrent på nyttårsaftan. Vi ligg på det nivået, men vi har fleire innleggingar enn den gongen. Det tyder nok på at dei muterte virusvariantane faktisk gir litt meir alvorleg sjukdom og fleire innleggingar, seier Nakstad i NRKs Nyheitsmorgon måndag.

– Så det vi høyrer frå andre land og også har lese i forskingsrapportar ser ut stemme òg i Noreg, seier han vidare.

Nakstad er bekymra for ei skeivfordeling på sjukehusa i det sentrale austlandsområdet, der nokre sjukehus har dei fleste koronapasientane og andre pasientar kan få utsett tilbodet sitt.

(©NPK)