Mykje norsk ull blir ikkje brukt
Berre ein firedel av ulla som blir produsert i Noreg, blir brukt. No jobbar ein med å finne nye måtar å utnytte norsk ull på.
– Det kostar pengar å sende ull til ullmottaket. Hadde det vore ordningar for det, hadde eg sjølvsagt sendt den, seier villsaubonde Guttorm Gudmestad til NRK
I 2016 fjerna Landbruksdirektoratet tilskotet for ulla av lågast kvalitet. Det gjeld i stor grad ulla til dei eldste sauerasane. Klipping, frakt og sekker til ull kostar pengar. Å sende den «verdilause» ulla inn til ullmottak er eit tapsprosjekt for bøndene.
Artikkelen held fram under annonsen.
Forskar Lise Grøva ved Norsk institutt for bioøkonomi (Nibio) jobbar med å finne ut meir om kva den norske ulla kan brukast til gjennom utgreiingsprosjektet Verdifull.
– Det er for gale at vi i så lita grad tek i bruk den flotte, lokale ressursen som ulla er, seier ho til NRK.
– Ull kan erstatte plastprodukt i landbruket, filter, isolasjon, og mange andre ting, seier Grøva.
(©NPK)