Miljødirektoratet har fått søknader for nesten 100 millionar til grøne hurtigbåtar

Miljødirektoratet har fått tre søknader om støtte til utsleppsfrie hurtigbåtar på til saman nesten 100 millionar kroner.

Støtte via Klimasats til låg- og nullutsleppsløysingar i hurtigbåtar er ein del av satsinga til regjeringa på grøn skipsfart. Miljødirektoratet delte ut 26 millionar kroner til hurtigbåtprosjekt i 2019. Dei har delt ut 6 millionar til formålet tidlegare i år, heiter det i ei pressemelding.

I 2020 kan fylkeskommunar og kommunar få til saman 97 millionar i støtte for å redusere utslepp frå hurtigbåtar. 20 millionar av desse er øyremerkt utviklingskontraktar.

– Satsinga på hurtigbåtar med låg- eller nullutsleppsløysingar er ein viktig del av satsinga til regjeringa på grøn skipsfart. Det vil både gi lågare klimagassutslepp og utvikling av ny teknologi som kan styrke norsk næringsliv. Søknadene til Klimasats viser at fylkeskommunane er godt i gang med omlegginga til ei grønare framtid, seier klima- og miljøminister Sveinung Rotevatn (V) i pressemeldinga.

(©NPK)