MDG vil tvinge Støre til nasjonal giga-reiserabatt: – Skal nok bli samde

– Vi skal nok bli samde om dette, seier MDG-nestleiar Ingrid «Sperregrensen» Liland til NTB.

Ho har teke med seg ein pappfigur av sjølvaste statsminister Jonas Gahr Støre (Ap) på trikken og suser av garde gjennom Grünerløkka – eit av MDGs kjerneområde.

– Vi har veldig god erfaring frå Oslo med å samarbeide med Arbeidarpartiet, vi fekk til ei ordentleg satsing på kollektivtrafikk her i byen, seier Liland.

– Bra dyrtidstiltak

No er eit av MDGs tydelegaste krav til ei ny raudgrøn regjering eit omfattande kollektivløft for heile landet. Dei vil gi alle innbyggjarar tilbod om eit nasjonalt månadskort til 499 kroner i månaden.

For det skal ein kunne reise så mykje ein vil på all kollektivtransport med buss, tog, trikk, ferje, hurtigbåt og T-bane. Både korte og lange distansar.

– For det første er det veldig effektivt tiltak for å få folk til å setje igjen bilen, og ikkje minst eit bra dyrtid-tiltak for alle som har stram økonomi. I tillegg kuttar det forureining, seier Liland.

Trur på ja

MDG-nestleiaren ser bort på pappfiguren av statsministeren, som har fått på seg ein MDG-vest for høvet, og seier at ho trur han vil seie ja.

– Vi ser at i land som Tyskland har sosialdemokratane og dei grøne gått saman om eit sånt nasjonalt månadskort.

Vidare peikar Liland på at MDG saman med Arbeidarpartiet og noverande kunnskapsminister Kari Nessa Nordtun fekk til gratis buss i Stavanger då Nordtun var ordførar der.

Vil kutte motorvegprosjekt

I Tyskland har dei kalla månadskortet for «Deutschlandticket», til ein pris på 58 euro i månaden. No vil altså MDG ha ein Norgesbillett etter same mal.

Finansdepartementet har rekna ut at ordninga med nasjonalt månadskort vil koste mellom 3 og 4 milliardar kroner.

– Det er berre å kutte eitt motorvegprosjekt, så har vi finansiert dette, seier Liland.

– Det vil vel føre til auka trafikk – er det plass til det på bussane?

– Vi går også til val på eit mykje betre tilbod over heile landet, med meir bussar og tog. Det går hand i hand. Om fleire reiser, vil vi også byggje opp tilbodet.

Ingrid «Sperregrensen» Liland

MDG kjempar for tida ein innbiten kamp om å komme over sperregrensa på 4 prosent i stortingsvalet. Det vil sikre dei mange fleire mandat på Stortinget og større styrke.

Sidan ei botnnotering med eit snitt på 2,4 på meiningsmålingane i februar, har partiet gradvis klatra oppover og ligg i august så vidt over den magiske grensa, ifølgje Poll of polls.

Det siste oppsvinget på målingane kom etter at MDG-nestleiaren søkte om å ta mellomnamnet Sperregrensen. Kan det vere ein samanheng?

– Eg trur i alle fall veldig mange har vorte påmint kor viktig sperregrensa er for norsk klimapolitikk, seier Liland, som enno ikkje har fått svar på namnesøknaden.

NRKs siste supermåling viser at MDG hentar 30 prosent av stemmene sine frå Oslo, og at oppslutninga om partiet er langt større i hovudstaden enn resten av landet.

– Spesielt i Oslo er det veldig mange som har stemt MDG før, og som har sett kva MDGs politikk gjer for ein levande grøn by. Med klimakutt, satsing på kollektiv og sykkelsatsing, seier MDG-nestleiaren.

Vil verne mot ekstremvêr

I vekene før sist stortingsval i 2021 vart klima plutseleg eit brennheitt tema, medan det har vore meir fråverande i valkampen i år. Liland meiner at MDG er det einaste partiet som snakkar om klima også når det ikkje trendar, og at det er noko dei tener på.

– Vi har snakka om klima kvar dag med veljarar. Når vi bankar på dørene til folk, takkar dei oss. Folk er sjokkert over at klima ikkje er på dagsordenen!

Ute av trikken og ute i Oslos gater regnar det så smått. Papp-Støre blir våt.

– Vi må verne Støre mot ekstremvêr. Det har vi tenkt å gjere i fleirtalet på raudgrøn side også! (©NPK)