Mange får ny fastlege

Stor belastning på legane.

Frå 1. mars vert legetenesta i Gloppen utvida med ein ny fastlegeheimel. Det vil medføre endringar i pasientlistene.

Gloppen kommune har vedteke å utvide talet fastlegar frå sju til åtte. Det vert gjort for å ta vare på stabiliteten i legetenesta i kommunen.

Stort arbeidspress

– Det er generelt utfordrande i heile landet å fylle fastlegestillingane, men vi har greidd det, seier leiar i legetenesta i Gloppen, Thomas Hebard.

Han meiner det skuldast fokus på fag, godt miljø og trygge økonomiske rammer.

Men arbeidsbelastninga er svært stor. Legane i Gloppen, som har eiga legevakt, har eitt døgn vakt i veka og 72 timars vakt i helgane på toppen av ei arbeidsveke som på landsbasis er 55 timar.

– Her i Gloppen er belastninga litt mindre, men langt over den vanlege arbeidsveka på 37,5 timar, seier han.

Fleire å dele på

Ved å tilsetje ein ny fastlege, vert det fleire å dele vaktbelastninga på og meir fritid. Det vil betre arbeidssituasjonen og gjere tenesta meir berekraftig på sikt.

Det vil bety at ein lege som nett har hatt vakt, vil få fri. Det har ikkje vore mogeleg til no, men det vil framleis vere behov for å leige inn vikarar i periodar.

Thomas Hebard meiner Gloppen har ei stabil legeteneste, men strekar under at tenesta er sårbar, personavhengig og krev kontinuerleg fokus.

– I dag har legane i Gloppen 800-850 pasientar på listene sine. Det er om lag som snittet i Sogn og Fjordane. Det vert redusert til 700-800, seier Hebard.

Får ny fastlege

Når det no blir åtte fastlegar, må pasientlistene justerast ved at dei sju fastlegane må avgje pasientar til den nye legen. Om kort tid vil derfor folk få brev eller e-post om at dei har fått ny fastlege.

– Det vert gjort ved at Helfo heilt tilfeldig plukkar ut pasientar og tildeler ny fastlege, seier Hebard og strekar under at dette skjer heilt utan at fastlegen har påverknad på resultatet.

– Særleg personar med kroniske lidingar og eit langvarig pasientforhold til fastlegen sin vil kanskje reagere negativt på å måtte skifte?

– Dersom nokon får ny fastlege mot sin vilje, kan vedkomande søkje seg tilbake, men dei må rekne med å stå på venteliste og i mellomtida halde seg til den nye legen, opplyser Thomas Hebard.

Skal lyse ut

Han opplyser at det har vore ein periode med fulle pasientlister, slik at ikkje alle har hatt fastlege. Kor mange som har vore i ein slik situasjon, veit han ikkje, men med åtte fastlegar aukar kapasiteten i tenesta slik at alle no vil få dette.

Thomas Hebard opplyser at Signe Sofie Juul er tilsett som langtidsvikar i Gloppen. Ho har vore i Gloppen tidlegare og er kjend for mange pasientar. Ho går no inn som vikar i den nye legestillinga.

– Ho er ein svært dyktig lege. Om kort tid vil vi lyse ut fastlegestillinga. Målet er tilsetjing før hausten, seier Thomas Hebard.

Ein ny lege og meir støttepersonell betyr at legesenteret er fylt heilt opp og ikkje har meir ledig romkapasitet.