Lærdalstunnelen blir stengt på kvelds- og nattetid
Statens vegvesen har vedteke å stengje Lærdalstunnelen frå klokka 18 til klokka 6 når arbeider med å oppgradere tunnelen skal starte.
Vegvesenet planlegg å starte oppgraderinga av den lengste tunnelen i verda i 2025, og skal etter planen vere ferdig innan fire til fem år, skriv Statens vegvesen i ei pressemelding.
– Det er ikkje mogleg å oppgradere tunnelen utan av det får konsekvensar for omverda. Vi har komme til at det er betre med kvelds- og nattestenging enn å stengje tunnelen heilt, seier leiar for tunneloppgradering Stig Berg-Thomassen i Statens vegvesen.
Artikkelen held fram under annonsen.
Tunnelen er med dei 24,5 kilometrane sine den lengste vegtunnelen i verda og ligg mellom Lærdal og Aurland.
Med stenging på kvelds- og nattetid vil det ta to til tre år å ferdigstille sprengingsarbeidet i tunnelen. Det er eit til to år lenger enn om tunnelen hadde vore stengd døgnet rundt. I denne perioden vil det ikkje vere mogleg å sleppe gjennom utrykkingskøyretøy når tunnelen er stengd.
Berg-Thomassen beklagar ulempene arbeidet vil føre til for trafikantane. (©NPK)
