Klare for den største turdagen i landet
Friluftslivets år held fram med stort avspark for turhausten. I Gloppen blir det Kom deg ut-dag med aktivitetar for store og små.
– Stadig fleire vil ut på tur i norsk natur, men vi vil ha endå fleire med! Særleg vil vi ha med nye folk i enkle aktivitetar nær der folk bur, seier Trude Eimhjellen i Midtre Nordfjord Turlag.
Ho fortel at målet med Kom deg ut-dagen og alt det andre som skjer i Friluftslivets veke er å vise kor enkelt, rimeleg og morosamt det er å drive med friluftsliv i nærmiljøet.
Annonse
Riv ned dørstokken
– Vi riv ned dørstokken! Kom deg ut-dagen er gratis, det er lett å bli med, du treng ikkje vere medlem i DNT og det er berre å møta opp, fortel Eimhjellen.
Barnas Turlag Gloppen planlegg aktivitetar ved Veslevatnet på Sandane denne dagen.
MNT arrangerer tur til Haugabreen 6. september og tur over Nordfjordryggen 7. september.
Annonse
Kom deg ut-dagen er ein nasjonal turdag i regi av dei ulike foreiningane i Den Norske Turistforening (DNT) og blir arrangert kvar haust og vinter. Hovudmålgruppa er barnefamiliar, men Friluftslivets veke har mange ulike aktivitetar for alle.
Sove ute
Før sjølve Kom deg ut-dagen er det Natt i naturen. Det skal gi folk ei morosam overnatting ute, anten dei har gjort det før eller det er aller første gong dei søv ute.
– Det treng ikkje vere vanskeleg å få ei heilt unik naturoppleving. I Trivselskogen på Sandane er det tilrettelagt for overnatting, med gapahukar, der ein kan sove med, eller utan hengekøye.
Kom deg ut-dagen markerer starten på Friluftslivets veke som i år er endå større fordi det er Friluftslivets år.
Annonse
