Høgre står på sitt – seier nei til hasteinnkalling

Framstegspartiet sende torsdag ut eit brev til andre parti for å be om at stortingsrepresentantane møtest så snart som mogleg. Berre KrF har så langt uttrykt støtte.

– Høgre har vore tydelege heile vegen på at det landet treng, er langsiktige løysingar for alle, ikkje løpande tiltakspakkar som varer i nokre månader. Svaret vårt er derfor det same som då Senterpartiet foreslo dette i august, og det er at Høgre ikkje vil støtte eit sånt initiativ, skriv Høgre-nestleiar Henrik Asheim til NTB.

I vår gjekk partiet saman med Frp, KrF og Sp for eit mellombels kutt i drivstoffavgiftene. Men i sommar gjorde partileiar Ine Eriksen Søreide det klart at dei ikkje ville støtte ein ny runde når kutta utløp 1. september – med mindre prisane var ekstraordinært høge.

Slik biletet er i dag, er nye avgiftskutt ikkje noko Høgre vil gå inn for, ifølgje Asheim, som meiner endringar i skattar vil gi meir føreseielegheit.

– Høgre meiner det er betre å prioritere skattelettar til folk og bedrifter, seier han. (©NPK)