Ho skal leie Kystmuseet i Florø
Musea i Sogn og Fjordane har tilsett Annette Langedal Holme som museumsleiar ved Kystmuseet i Florø, melder stiftinga i ei pressemelding.
Holme har ein mastergrad i historie og kjem frå stillinga som seniorrådgjevar i Fylkesarkivet i Vestland.
I rolla som museumsleiar vil ho ha det faglege leiaransvaret for utstillingar, arrangement og formidling ved Kystmuseet.
Artikkelen held fram under annonsen.
– Dette var veldig kjekt. Eg gleder meg til å ta fatt på den spennande oppgåva med å leie Kystmuseet, seier Holme i pressemeldinga.
Holme er eit kjent ansikt i Musea i Sogn og Fjordane, ho har tidlegare jobba i ulike roller både ved Kystmuseet og Nordfjord Folkemuseum.
– Vi er svært nøgde med at Annette har takka ja til stillinga som museumsleiar. Med denne tilsetjinga har vi fått på plass ei sentral brikke i utviklinga av Kystmuseet, seier administrerande direktør Kjartan Aa Berge ved Musea i Sogn og Fjordane.
Holme tiltrer i stillinga 1. januar 2021.