Har inngått forlik om erstatning
Rådmannen i Gloppen rår kommunestyret til å godkjenne rettsforliket som er inngått mellom Gloppen kommune og eigarane av gbnr. 77/44 i saka om erstatning for veggrunn med meir i Selvågane på Sandane.
Saka om fastsetting av erstatning for arealet til den nye vegen i Selvågane har pågått i fleire år. No ligg det føre eit rettsforlik i saka som rådmannen ber politikarane om å godkjenne.
310 kroner rutemeteren
I forliket får grunneigar ei erstatning på 310 kroner per kvadratmeter, pluss 185.000 kroner i erstatning for ulempe og dekking av utgifter. Grunneigar skal på si side betale kommunen 660.000 kroner for fordelen den nye vegen gjev, med tilgang til vatn og avløp på attverande eigedom. Denne summen skal betalast når resteigedomen blir seld eller teken i bruk.
Tanken om å byggje ny veg mellom Åsavegen og Fylkesveg 615 i Selvågane har stått i dei kommunale planane sidan 1980-talet. I 2001 kom vegen inn på reguleringsplanen for området Vonheim-Storebrua.
– Det gjekk likevel mange år før det vart sett av løyvingar til vegen. For nokre år sidan vart det gjort forsøk på å kome fram til ein frivillig avtale om grunnavståing, men dette lukkast ikkje. Kravet kommunen den gongen ikkje gjekk med på var 300 kroner per kvadratmeter, pluss fritak for grunneigar for refusjonskrav og betaling for fordelen av vegen, skriv rådmannen i si saksutgreiing.
Dom i januar i år
Partane vart då samde om at erstatninga skulle fastsettast i eit avtaleskjønn. Motparten i avtalen er eigarane av gbnr. 77/44 i Gloppen, Ingrid Marie Sandene og Steffen Sandene.
– Arealet kommunen skal overta er om lag 2.800 kvadratmeter, og inkluderer i tillegg til sjølve vegen ein ny parkeringsplass ved Fylkesveg 615. Også eit mindre areal på nordaustsida av vegen er med i avtalen slik at eigedomsgrensa mot seljar sitt attverande eigedom følgjer vegen, forklarer rådmannen.
Fjordane tingrett avsa dom i avtaleskjønnet 12. januar 2017. I skjønnet vart rutemeterprisen sett til 500 kroner. I tillegg skulle kommunen betale same grunnpris i erstatning for vegfyllinga som vart liggande att på grunneigar, fastsett til 150.000 kroner. I skjønnet kravde kommunen frådrag for den meirverdien vegen gav til attverande eigedom, som i reguleringsplanen er avsett til bustader. Tingretten fastsette denne verdien til 660.000 kroner. Endeleg var partane samde om at det skulle betalast 2,5 prosent rente frå februar 2015, som var tidspunktet for avtalen om frivillig skjønn, og fram til betaling.
Kravde overskjønn
I februar i år vedtok formannskapet, med fem mot fire røyster, å krevje overskjønn. Dette var i samsvar med rådmannen i tilråding, som igjen støtta seg på råd frå kommunen sin advokat, Stig J. Harris i Advokatfirmaet Harris. Rådmannen tilrådde overskjønn først og fremst på grunn av for høg «strøkpris» og for utrekningsgrunnlaget for «strøkprisen».
Overskjønnet vart behandla i Gulating lagmannsrett måndag denne veka. Etter innleiinga og bevisføringa første dag, vart det – etter initiativ frå grunneigar – innleia forhandlingar om eit forlik.
– Det er dette forliket eg no legg fram til godkjenning. Etter godkjenning vil rettsforliket ha same rettsverknad som ein dom, opplyser rådmannen.
– Dyrt for kommunen
Kostnaden med rettsforliket kan oppsummerast slik: 868.000 kroner i grunnerstatning, 150.000 kroner i ulempeerstatning og 35.000 kroner til dekking av utgifter. Til saman blir dette 1.053.000 kroner.
– 660.000 kroner kome i frådrag når bustadområdet blir seld eller utbygt. Dette beløpet skal indeksregulerast. Til slutt vil nettoutgifta bli om lag 393.000 kroner, skriv rådmannen.
Saka om grunnkjøp i Selvågane har teke lang tid, og prosessen har vore dyr for kommunen.
– Eg vil likevel forsvare pengebruken. Det er viktig for ettertida å få ein riktig «strøkpris», og ikkje minst er det viktig at kommunen har fått gjennomslag for at det skal betalast refusjon eller kompensasjon for kommunale investeringar som ein privat eigar eller utbyggjar har fordel av, skriv Jan Kåre Fure.
Saka skal handsamast i formannskapet 13. desember og i kommunestyret 18. desember.
