Har fått 20 mill. kr til å vidareutvikling

Brødr. Aa har fått 20 mill. kroner i støtte for å vidareutvikle ein båt nummer to til reiarlaget The Fjords.

Den første båten heiter "Vision of The Fjords" og er banebrytande fordi det er ein hybridbåt med både konvensjonell motor og i tillegg batteridrift. Båten går i turisttrafikk i verdsarvområdet i Nærøyfjorden. På transportetappane syter dieselmotoren for framdrifta, medan fartøyet glir lydlaust fram inne i verdsarvområdet på batteridrift.

Banebrytande

- Vi søkte om 20 mill. kroner i utviklingsstøtte saman med reiarlaget The Fjords for å utvikle båt nummer to, stadfester dagleg leiar Tor Øyvin Aa. Målet er å vidareutvikle batteridrifta slik at fartøyet har hundre prosent elektrisk framdrift.
Fredag fekk Brødr. Aa melding om at dei får 20 mill. kroner til utviklingsarbeidet. Det er ein føresetnad for å gå vidare i prosjektet.
- I løpet av januar håpar vi å signere kontrakten, seier Aa.

PILOT-E
Dei 20 mill. kr er tildelte av Forskingsrådet, Innovasjon Norge og Enova gjennom samarbeidsprogrammet PILOT-E. Målet er utvikling av berekraftige og framtidsretta teknologiske løysingar innan maritim næring.
I alt 15 verksemder søkte på utviklingsmidlane, fem av dei fekk. I tillegg til Brødr. Aa er det Fiskarstrand, Siemens, Kongsberg Maritime og Wärtsilä.