Handle lokalt og vinn gåvekort
– Dei som tek sjølvi med handleposen sin i denne ramma, er med i trekninga av eit gåvekort på 5.000 kroner, seier Ingvill Hestenes, Kai Petter Sårheim og Knut Roger Nesdal.
Gloppen Næringsorganisasjon (GN) ønskjer å setje fokus på lokal handel. Støtta av kommunen, lovar dei at alle som handlar lokalt på nattope i kveld og som blir fotograferte i denne ramma ved Gloppebua, er med i trekninga av eit gåvekort som kan brukast i alle butikkar i Gloppen.
Lagar liv og røre
– Dette er ei oppfølging av inspirasjonssamlinga tidlegare i haust. Vi ønskjer å setje fokus på lokalt næringsliv og lokal handel. Vi har mange spennande butikkar i kommunen, og oppmodar om å tenkje lokalt og bruke desse butikkane i julehandelen, seier nestleiar i Gloppen Næringsorganisasjon, Ingvill Hestenes.
Ho minner om at butikkane lagar liv og røre i sentrum og er flinke til å støtte lag og organisasjonar med basarvinstar.
– Butikkane skaper òg arbeidsplassar. Det er viktig å handle lokalt og støtte alt butikkane bidreg med, supplerer næringssjef Knut Roger Nesdal.
Sosiale medium
For å vere med i trekninga av gåvekortet som er gjeve av kommunen ved ordføraren, må du stille deg opp i ramma som blir plassert ved Firdatun og la deg fotografere saman med handleposen din. Du kan ta bilete sjølv eller la andre hjelpe deg.
– Biletet skal leggjast ut på sosiale medium, merka med emneknaggen som blir ståande på ramma her, seier styremedlem i GN, Kai Petter Sårheim.
Stuntet vil bli gjenteke ein av laurdagane før jul, så her blir det to sjansar til å stikke av med verdfulle gåvekort – viss du handlar lokalt!