Frode Øverli legg Pondus på hylla

– Eg er lei av deadlinar. Det er noko eg har hatt heile karrieren, så det skal bli herleg å sleppa den rytmen, det stressa, seier Frode Øverli til Bergens Tidende.

Den fotballinteresserte teikneseriefiguren har fanga fleire generasjonars interesse i mange år, først som avisstripe i Dagbladet i 1995.

Bergens Tidende skriv at det ikkje blir eit tvert brot med Pondus-universet. Månadsbladet skal ifølgje avisa halda på ei stund til, etter kvart med miks av gamle striper med nyare ting frå andre serieskaparar. Han har også tilstrekkeleg med striper til å fylla den 25. boka i rekkja.

– Men det kjem ikkje lenger noko nytt i blad eller aviser. No vil eg laga ting i mitt eige tempo. Det skal bli herleg å komma ut av hamsterhjulet, uttaler Øverli, som seier han no vil fokusera meir på familielitteratur.

Han ser ikkje bort frå nye striper i framtida.

– Nei. No lagar eg det eg vil, når eg vil. Om eg får lyst til å laga ei Pondus-stripe eingong i framtida, så gjer eg det. Det er ingen som nektar meg, eg bryt inga lov, understrekar Øverli. (©NPK)