Framlegg til traséval for Byrkjelo-Grodås

Vegvesenet kjem med framlegg til kommunedelplan for ny E39 Byrkjelo-Grodås. På Byrkjelo ligg det føre tre alternativ til vegline, men det er det såkalla B-1 som blir tilrådd.

I dette alternativet startar ny E39  ved ungdomshuset like vest for Bergheimsvatnet og går nordover mot
tunnelinnslag aust for meieriet. Over heile strekninga går vegen over dyrka jord.

Kryss til eksisterande E-39

Tunnelinnslaget er planlagt med ein lang portal som vert fylt
att med lausmassar over portalen. Tunnelen under Utvikfjellet blir omlag 6,8 km.
Kryss til eksisterande E39 er planlagt like sør for tunnelinnslaget (sør for meieriet). Veg frå
eksisterande E39 mot krysset går gjennom grustaket ved Åland, under ny E39 og vidare på
austsida parallelt med E39. Dagens E39 med gang- og sykkelveg vil bli liggande og blir ført
over ny E39.

90-km/t

Ny E39 er dimensjonert for årsdøgntrafikk (ÅDT) på 6500 køyretøy per døgn og
dimensjoneringsklasse H5 etter handbok N100 (Utgåve 2013), som tilseier 90 km/t. Vegen
skal vere avkøyrslefri og lokalt vegnett må knytast til E39 via kryss. Kryssa kan utformast som
T-kryss eller planskilt kryss, men det skal sikrast plass til planskilde kryss. På veg i dagen er
det lagt opp til midtrekkverk med total vegbreidde 12,5 meter (køyrefeltbreidde på 3,5 m).
Det vert eigne forbikøyringsfelt på nokre strekningar der total vegbreidde blir 14,75 meter.
Tunnelen gjennom Utvikfjellet vil få fartsgrense på 80 km/t og blir 6.8 km lang ved alternativ B-1 og B-2.



To alternativ til

Vegvesenet har vurdert to alternativ til. Det eine, B-2,  startar ved Bergheim gard og går skrått over Storelva/Fonnagrova med ny bru på om lag 400 m. Vegen held fram på vestsida av elva fram til Teita, og kryssar her Storelva vinkelrett med ny bru på om lag 145 m. Vidare går vegen sør for Byrkjelo sentrum fram til
tunnelinnslag aust for meieriet. Tunnelinnslaget er planlagt med ein lang portal som vert fylt
att med lausmassar over portal. Tunnelen under Utvikfjellet blir omlag 6,8 km.
Kryss til eksisterande E39 er planlagt sør for Byrkjelo sentrum. Dagens E39 med gang- og
sykkelvegen vil bli liggande og blir ført under ny E39.

Når det gjeld B-3  (Byrkjelo vest), vil ny ny E39 starte ved Bergheim gard og gå

skrått over Storelva/Fonnagrova med ny bru på omlag 400 m. Vidare held vegen fram på vestsida av Storelva. Vest for sentrum vert det ny bru
på om lag 390 m over Storelva og veg fram til tunnelinnslag på Kleppe. Tunnelen under
Utvikfjellet blir omlag 6,5 km. Kryss til eksisterande E39 er planlagt nordvest for Byrkjelo sentrum. Lokalvegnettet kan nyttast til gang- og sykkeltrafikk.

Det bli informasjonsmøte om vegplanane i Breidarheim, Byrkjelo torsdag kl. 18.00