Foreslår størst skattekutt til dei som tener mest

Regjeringa foreslår ei rekkje endringar og justeringar i skattane og avgiftene neste år. I ei eiga oversikt har dei berekna skattenivået for fleire inntektsnivå.

Oversikta viser at dei foreslåtte endringane gir 200 kroner meir i skatt for dei som tener mindre enn 177.600 kroner i året, medan alle andre får eit skattekutt på mellom 0,1 og 0,2 prosent.

2000 kr til dei som tener mest

* Bruttoinntekt på mellom 177.600 kroner og 323.800 kroner gir eit skattelette på 200 kroner.

* 323.800-494.600 kroner inntekt gir skattelette på 600 kroner.

* 494.600-671.600 kroner inntekter gir skattelette på 800 kroner.

* 671.600-771.800 kroner inntekt gir skattelette på 1000 kroner.

* 771.800-906.000 kroner inntekt gir skattelette på 1200 kroner.

* 906.000-1.167.600 kroner inntekt gir skattelette på 1400 kroner

* 1.167.600 kroner inntekt og høgare gir eit skattelette på 2000 kroner.

– Ein går ut frå at 98 prosent av skattytarane får redusert eller uendra inntektsskatt. 85 prosent av skattytarane er anslått å få ein lette på over 200 kroner, skriv regjeringa.

Endringar i formuesskatten

Regjeringa foreslår også endringar i formuesskatten. Botnfrådraget, altså når formuesskatten byrjar å gjelda, blir auka frå 1,76 millionar kroner til 1,9 millionar kroner.

Men samtidig justerer regjeringa verdisetjinga av bustader slik at dei blir verdsette høgare når formuesskatten blir berekna.

I sum jamnar ut desse to grepa kvarandre. Endringa i botnfrådraget fører til 525 millionar kroner i tapte skatteinntekter, medan dei andre grepa i formuesskatten aukar skatteinntektene med tilsvarande sum.

– Det er anslått at dei samla endringane i formuesskatten i gjennomsnitt gir noko skjerping for personar med dei høgaste inntektene og formuane, skriv regjeringa i budsjettet.

Regjeringa understrekar at det ikkje blir nokon store endringar gjorde i formuesskatten og omtaler grepa sine som «forbetringar og justeringar». (©NPK)