Folk står lenger i jobb
Nye tal frå Statens pensjonskasse viser at fleire 62-åringar vel å jobbe lenger.
– Når fleire vel å stå lenger i arbeid betyr det høgare inntekt for kvar enkelt, og meir arbeidskraft for samfunnet. Det er bra for alle, seier arbeids- og inkluderingsminister Kjersti Stenseng i ei pressemelding.
Det første kullet etter ny pensjonsreform i offentleg sektor held i stor grad fram med å jobbe og ventar med å ta ut pensjon.
Annonse
SPK har samanlikna to omtrent like store årskull: 1962-kullet, som følgjer gammalt regelverk, og 1963-kullet, som er det første som blir omfatta av ny offentleg tenestepensjon.
Samanlikninga viser at 6 prosent fleire i 1963-kullet held fram med å jobbe ved 62 år. Auken er noko større i kommunal sektor, med 7 prosent, mot 5 prosent i staten.
Tala gir eit tidleg bilete av korleis det nye regelverket påverkar faktiske val i overgangen mellom arbeid og pensjon. (©NPK)
