Fleire hundre nye medlemmer i Mållaget etter FpU-stikk

Framstegspartiets ungdom lanserte ein kampanje for valfritt sidemål med plakaten «F**k nynorsk». Over natta fekk Noregs Mållag fleire hundre nye medlemer i ein motreaksjon.

– Vi er leie av at norske elevar må bruke tid på fag som ikkje er relevante for arbeidslivet, sa FpU-leiar Andreas Brännström til NRK om kampanjen for valfritt sidemål, der ungdomspartiet brukte ein plakat med bilete av Ivar Aasen og teksten «F**k nynorsk».

– Hovudpoenget er at vi vil unge skal utdanne seg for framtidas arbeidsliv. Språka er omtrent like. Når mange ikkje les og skriv godt nok, må ein prioritere hovudmålet.

Innmeldingsstorm

Leiaren i Noregs Mållag, Peder Lofnes Hauge, var svært kritisk til FpU-kampanjen. Til NRK sa Hauge at han vart oppgitt, og kalla kampanjen skamlaus anti-nynorskpopulisme frå FpU.

– Det å få opplæring i både nynorsk og bokmål i grunnskule og vidaregåande gir ein språkleg fridom til å velje om ein vil bruke nynorsk eller bokmål resten av livet, i staden for ein falsk fridom der ein vel det vekk i tre formative år på vidaregåande, seier han.

Sidan saka blei omtalt hos NRK måndag, har over 400 nye medlemmer meldt seg inn i Mållaget. Hauge meiner dette er eit teikn på at FpU og Frp er i utakt med folk flest.

Vil skape engasjement

Leiar i Vestland FpU, Martine J. Baarholm seier kampanjen har som føremål å skape engasjement og meiner Mållaget heller burde svare på kvifor dei ønsker å tvinge elevane til å lære eit skriftspråk dei ikkje vil få bruk for, enn å hisse seg opp over ordbruken.

– I skuleval blir det brukt spissformuleringar over ein låg sko. Noregs Mållag bidreg til det ved å kalle kampanjen skamlaus og anti-nynorskpopulisme, seier Baarholm til NRK.