FHI åtvarar om svindel-e-post
FHI åtvarar om ein aktør som gir seg ut for å vera FHI i ein e-post der dei ber mottakarane om å leggja inn informasjon om helsestatus.
Overskrifta i e-posten er: «Pålegg: Komplettering av helseopplysninger». I e-posten blir mottakarane bedne om å «gå til din personlige portal» for å registrera noverande helsestatus.
Folkehelseinstituttet (FHI) opplyser at dei ikkje kjenner avsendaren, og dei ber befolkninga om å vera varsame med å nytta tenesta og leggja inn private helsedata.
Annonse
– Instituttet har ikkje ein personleg portal som samlar inn helseopplysningar frå innbyggjarane. Folkehelseinstituttet vil aldri be om kredittkortinformasjon eller kontonummer via SMS eller e-post, opplyser FHI i ei pressemelding.
Når du får ein e-post, bør du sjekka at avsendaren faktisk er Folkehelseinstituttet. E-postadressa til avsendaren skal som hovudregel ha «fhi» i det som står etter alfakrøllen (@), til dømes info@fhi.no. (©NPK)
