FHI: Alle får truleg tilbod om dose to før hausten
FHI-direktør Camilla Stoltenberg seier at alle vil ha fått tilbod om dose to med koronavaksine før sommaren er over om alt går etter planen.
– Det er mogleg og tenkjeleg, viss ein jobbar for det, at vi skal kunne tilby vaksinedose to til alle innan siste del av august, seier Stoltenberg til P4.
Planen føreset at leveransane av Pfizer- og Moderna-vaksinane kjem som planlagt, og dessutan at kommunane legg til rette for fleksibel vaksinasjon.
Artikkelen held fram under annonsen.
– Dette har vi vore førebudde på lenge, og kommunane må førebu tilbodet, slik at folk får moglegheit til å få vaksine òg i ferien. Vi vil jobbe intensivt gjennom heile sommaren for å halde fram med å ha den høge vaksinedekninga vi no har, seier FHI-direktøren.
FHI har tidlegare anslått at alle vaksne får tilbod om første dose innan midten av juli.
(©NPK)
