Coop kallar tilbake barnemat

Coop Norge kallar tilbake tubematen Änglamark Økologisk «Grötis» Smoothie for dei minste barna. Det er oppdaga mugg på tuten til enkelte klemmeposar.

Det er Änglamark Økologisk «Grötis» Smoothie med eple, fersken, banan og havre som no blir kalla tilbake. Dette gjeld produkt som er merka med EAN-kode 7340011455318 og best før-dato 09.01.2019. Det er funne mugg på tuten på enkelte klemmeposar etter ein feil under fylling av posane, opplyser Coop i ei pressemelding.

Coop Norge tilrår forbrukarar som har kjøpt dette produktet med oppgitt EAN-kode og best før-dato, å levere produktet til butikken og få pengane tilbake. (©NPK)