Bustadeigarar må førebu seg på aukande buutgifter framover
Dyrare straum er berre byrjinga på aukande bukostnader framover, meiner organisasjonen Huseierne. Dei ber bustadeigarar førebu seg på trongare økonomiske tider.
Tidlegare i oktober la organisasjonen fram ein prognose som viser at bukostnadene vil stige med rundt 30 prosent dei neste åra, fortel NRK.
– Bustadlånsrenta er den store kostnaden for mange. Renta går oppover og kjem nok til å vere høgare enn ho er i dag. Vi får òg høgare straumprisar. Det har vi allereie merka i haust, seier forbrukar- og kommunikasjonssjef Carsten Phil hos Huseierne.
Artikkelen held fram under annonsen.
Også dyrare forsikringar, auka kommunale utgifter og større vedlikehaldsutgifter på grunn av eit våtare klima vil bidra til auka bukostnader.
Phil meiner det er eit faresignal når det å kjøpe ein bustad ikkje blir den største utfordringa, men det å bu og bli verande der.
Også forbrukarøkonom Derya Incedursun i Nordea er bekymra, og meiner at låglønsyrke og småbarnsfamiliar vil merke det mest.
Ho rår bustadeigarar til å reforhandle avtalar både med bankar, forsikringsselskap og straumleverandørar, og å gå gjennom eige forbruk, medan Phil ber politikarar om å vere merksame på konsekvensane av å auke kommunale avgifter.
(©NPK)
