Bjørn Gimming innstilt som ny leiar i Bondelaget
Bjørn Gimming frå Idd i Halden kommune er innstilt som ny leiar i Norges Bondelag.
Valnemnda i Norges Bondelag har innstilt Bjørn Gimming frå Østfold som ny leiar, melder organisasjonen på nettsidene sine. Egil Christopher Hoen frå Buskerud og Bodhild Fjelltveit frå Vestland er innstilt som 1. og 2. nestleiar.
Val av nytt styre skjer på årsmøtet til Norges Bondelag som blir gjennomført digitalt 9. og 10. juni.
Artikkelen held fram under annonsen.
– Bjørn Gimming har kvalifikasjonar som gjer han godt skikka til å leie organisasjonen i ei krevjande tid. Han er svært godt kjent med Norges Bondelag gjennom mange års arbeid i ulike verv på alle nivå, og med god kjennskap til jordbruksforhandlingane. Bjørn er analytisk, grundig og dyktig i det politiske arbeidet, og har eit stort nettverk. Etter eit mangeårig arbeid med klima og miljø, har Bjørn god erfaring på fagområde som er svært viktige for norsk landbruk framover, seier leiar for valnemnda Anne Kristine Rossebø.
