Beste påskestart på mange år for turistforeininga
Overnattingstala ved hyttene til Den Norske Turistforening (DNT) er tilbake på 2019-nivå. Fint vêr og godt føre har gitt foreininga ein sterk påskestart.
Etter fleire år med koronarestriksjonar og varierande vêr i fjor, er det igjen stor pågang på DNTs betente fjellhytter. Dei fleste hyttene har ein auke i talet på overnattingar frå i fjor, ifølgje turistforeininga.
– Hyttene våre melder om godt besøk i alle fjellområde der vi har betente hytter. Det er tydeleg at folk er interesserte i god gammaldags hyttepåske i fjellet, seier Dag Terje Klarp Solvang, generalsekretær i DNT.
Artikkelen held fram under annonsen.
Han fortel at overnattingstala no er tilbake på 2019-nivå, det vil seie slik dei var før pandemien.
Og det er ingen grunn til at interessa skal minke denne påska. Fleire stadar i landet er det minusgrader om natta og strålande sol om dagen, som gjer at draumeføret held seg heile veka.
– Vi oppmodar alle som ikkje har bestemt seg for kva dei skal gjere resten av påska til å utnytte forholda og komme seg til fjells. Mange av hyttene har godt med plass både no og seinare i påska, seier Solvang. (©NPK)