Av-og-til åtvarar mot meir heimedrikking på 17. mai

Alkovettorganisasjonen Av-og-til ber alle foreldre tenkje på barna og vere klar over alkoholinntaket når mange av dei vanlege aktivitetane fell bort.

– Vi er redd færre barnearrangement og fleire heimefeiringar vil bety meir alkohol framfor barna, seier generalsekretær Randi Hagen Eriksrud.

Ho ber foreldre tenkje seg om før dei opnar sjampanjane og startar 17. mai-feiringa i år. Med meir tid heime kan eitt glas fort bli til tre.

– Barn blir fort utrygge når vaksne drikk alkohol. Det er viktig at vi vaksne veit kvar grensa går, og når det går frå triveleg til ubehageleg for barna, seier ho.

Organisasjonen minner om at feiringa er barna sin dag. Dei oppmodar om at familiane legg opp til ein dag på premissane til barna sjølv om leik i skulegardane og barnetoget fell bort i mange av kommunane.

(©NPK)