Auka straumprisar i første halvår – noregspris lønte seg i heile landet

– Det har utvilsamt vore svært lønnsamt å ha noregspris i 2026 for dei aller fleste hushalda. Me kan aldri garantera at det også vil lønna seg framover, men om me ikkje får ein veldig våt haust, vil det nok vera mykje å spara også fram til jul, seier næringspolitisk rådgivar Lars Tennbakk Bockman i Fornybar Norge, som organiserer straumselskapa.

Ein kald og tørr vinter har bidrege til å senda straumprisane oppover dei første seks månadene i år.

Den kalde vinteren førte til at straumforbruket gjekk opp, samtidig som det kom 60 prosent mindre nedbør enn normalt i januar og februar, ifølgje Fornybar Norge.

– Mange har fått lågare rekningar

Organisasjonen er no klar med straumprisindeksen sin for første halvår, der dei ser på korleis straumrekninga til eit gjennomsnittshushald vart.

– Trass i dei auka straumprisane har mange hushald fått lågare straumrekningar samanlikna med i fjor. Årsaka er i hovudsak noregspris og dessutan redusert el-avgift, skriv Fornybar Norge i gjennomgangen sin.

I Midt- og Nord-Noreg har likevel rekningane auka sidan i fjor, også for dei som har valt noregspris.

– Desse landsdelane hadde lågare straumprisar enn noregspris i fjor.

Har spart fleire tusen

Men i år har det så langt lønt seg med noregspris i heile landet, ifølgje straumprisindeksen.

– Eit gjennomsnittleg hushald i Sør-Noreg har kunna spara over fire tusen kroner, men også nordnorske hushald har kunna spara eit par hundrelappar, skriv Fornybar Norge.

Her er ei oversikt over den totale den totale straumrekninga i første halvår for snitthushald i dei ulike straumsonene (inkludert nettleige og avgifter):

NO1 (Austlandet): 8677 kroner med noregspris, 12 696 kroner utan noregspris.

NO2 (Sørlandet og Sørvestlandet): 10 060 kroner med noregspris, 14 217 kroner utan noregspris.

NO3 (Nordre del av Vestlandet og Midt-Noreg): 9524 kroner med noregspris, 13 108 kroner utan noregspris.

NO4 (Nord-Noreg): 8731 kroner med noregspris, 8911 kroner utan noregspris.

NO5 (Midtre del av Vestlandet): 9696 kroner med noregspris, 13 826 kroner utan noregspris.

Dyrare enn venta

Noregspris vart innført av regjeringa i fjor haust, og inneber at privatpersonar kan velja ein fast pris på straumen i bustader og hytter.

I år er noregsprisen på 50 øre per kilowattime inkludert moms. Ordninga er vedteken fram til ut 2029, men regjeringa har sagt at sjølve prisen skal justerast 1. januar neste år, i tråd med utsiktene i straumprisutviklinga.

Dei høge straumprisane så langt i år har ført til at noregspris har vorte ein god del dyrare for regjeringa enn det dei anslo i statsbudsjettet.

I revidert nasjonalbudsjett i mai auka dei derfor løyvinga til ordninga med ti milliardar kroner. (©NPK)