Gloppen hotell satsar på det norske

Hos Bodil på Gloppen hotell finn du noko ganske unikt i desse tider - eit nærast heilnorsk kjøkenpersonale.

Midt i Sandane sentrum finn du tradisjonsrike Gloppen Hotell, med røter over 150 år tilbake i tid.

Fire av fem

Bodil Fjellestad Eikrem er inne i sitt 16 år som kjøkensjef på det populære hotellet, og leiar i dag eit kjøken som legg vekt på høg kvalitet med lokale sesongvarer i sentrum.

Med seg i kjøkenhæren har ho fire faste kokkar og fire lærlingar. Alle så nær som ein er norske.

– Eg trur ikkje det er så mange hotell eller restaurantar som kan skryte av at dei har berre norsktalande personale på kjøkenet, smiler ho.

Mattradisjonar

For kokkar og kjøkenhjelp er mangelvare for tida. Dei siste åra er det færre og færre som vel å utdanne seg kulinarisk her i landet. Serveringsstadane må difor importere arbeidskraft for å få det til å gå rundt.

– For oss er det ein klar fordel å ha norske kokkar. Vi satsar mykje på lokalmat, og det er ikkje alltid lett for ein som kjem utanfrå å sette seg inn i norske mattradisjonar. I tillegg har vi fleire som har lokal tilknyting, og som etter kvart veit kva gjestane vil ha, seier ho.

Lagarbeid

Ho trekk fram stabilitet og kontinuitet som viktige punkt for å skape både god mat og eit godt arbeidsmiljø.

– På eit kjøken lærar ein kvarandre å kjenne på både godt og vondt, og vi blir som ein familie. Hos oss er det kjefting, smelling og latter om eitt anna, men vi veit kvar vi har kvarandre. Det er ikkje berre eg som sit og skriv menyen, vi er eit lag som jobbar godt i lag.

Menyen skiftar kvar tredje veke, og midt i juni er det fersk fisk som spelar hovudrolla.

Lokalt og i sesong

– Vi prøver å tenke på kva vi har lokalt til ei kvar tid og bruke det som er i sesong. Vi brukar lokalt svin med lokal honning til dømes, og rabarbra er i sesong akkurat no. Om ikkje lenge kjem jordbæra, så dei kjem nok med på neste meny. Akkurat no får eg masse fantastiske urter frå Devik som er i full blomster, seier ho entusiastisk.

Sesongen er godt i gang på Gloppen hotell, og Bodil fortel om hektiske dagar med bryllaup nesten kvar helg, og tilnærma fullteikna bøker til hausten.

Då er det godt å ha lærlingar å ty til. I dag har ho fire i lære, men ei av dei er ferdig i august.

Rekruttering

– Frå hausten av hadde eg håpa å få med meg to nye lærlingar, slik at vi til saman hadde fem. Men det kan sjå ut som at det blir første gong på dei 16 åra eg har jobba her at vi ikkje får tak i nok lærlingar, seier ho.

Det har ført til at hotellet har måtte tenke litt alternativt for sommarsesongen.

– No er vi så heldige at vi får hjelp frå ungdomsskuleelevar. Det er sjølvsagt ikkje berre å steppe rett inn i eit a-la-carte-kjøken, men ungdomane skal hjelpe oss med ein del av preppinga, slik som å skrelle og kutte. På den måten klarar vi oss. Og kven veit, på denne måten kan vi kanskje rekruttere litt fleire inn i kokkeyrket òg, konkluderer kjøkensjefen.